O‘QISHDAN CHIQISH VA TO‘LOVLARNI QAYTARISH SIYOSATI
O‘QISHDAN CHIQISH
Ota-ona (qonuniy vakil) o‘quvchining Maktabdagi ta’limini muddatidan oldin to‘xtatish to‘g‘risida Maktab ma’muriyatiga yozma xabarnoma taqdim etadi. Xabarnoma imzolangan ariza, rasmiy elektron pochta yoki Maktab tomonidan qabul qilingan boshqa rasmiy aloqa vositalari orqali yuborilishi mumkin. Xabarnoma Maktab tomonidan qabul qilingan sana o‘qishni to‘xtatish to‘g‘risidagi murojaat qabul qilingan sana hisoblanadi hamda qaytariladigan mablag‘ni hisoblash uchun asos bo‘ladi.
Agar o‘qishni to‘xtatish to‘g‘risidagi xabarnoma Maktabga dam olish kuni, bayram kuni yoki ta’til davrida yuborilgan bo‘lsa, ushbu xabarnoma Maktab tomonidan o‘quv jarayoni qayta boshlangan birinchi ish kuni qabul qilingan deb hisoblanadi.
Maktab to‘lovlarini qaytarish masalasi Maktab ma’muriyati tomonidan o‘qishni to‘xtatish tasdiqlanganidan, tegishli tasdiq xati berilganidan hamda o‘quvchini Maktabdan chiqarish bilan bog‘liq barcha ichki tartib-taomillar to‘liq yakunlanganidan keyin ko‘rib chiqiladi.
Maktab ma’muriyati tomonidan o‘qishni to‘xtatish to‘g‘risidagi rasmiy tasdiq xati berilganidan keyin Maktabning Moliya bo‘limi to‘lovlarni qaytarish tartibini amalga oshirish maqsadida ota-ona (qonuniy vakil) bilan rasmiy elektron pochta orqali bog‘lanadi.
To‘lovlarni qaytarish jarayonini boshlash uchun quyidagi shartlar bajarilishi lozim:
- O‘quvchi Maktabga tegishli barcha mol-mulkni to‘liq qaytarishi shart, jumladan:
- kutubxona kitoblari;
- darsliklar;
- kirish kartalari; va
- boshqa vaqtincha foydalanish uchun berilgan Maktab mulki.
- Maktab oldida to‘lanmagan qarzdorlik mavjud bo‘lmasligi lozim, shu jumladan:
- o‘qish uchun to‘lovlar;
- ovqatlanish xizmati uchun to‘lovlar (agar qo‘llanilsa);
- boshqa shartnoma asosidagi to‘lovlar.
- To‘lovlarni tasdiqlovchi hujjatlar (to‘lov kvitansiyalari, bank to‘lov topshiriqnomalari yoki boshqa to‘lovni tasdiqlovchi hujjatlar) taqdim etilishi lozim, agar ularni taqdim etish to‘lovlarni qaytarish uchun zarur bo‘lsa.
- To‘lovni qaytarish uchun bank rekvizitlari yozma ravishda taqdim etilishi va ota-ona (qonuniy vakil) tomonidan tasdiqlanishi lozim.
Maktab to‘lovlarni qaytarishni ushbu Siyosat, O‘quvchiga pullik ta’lim xizmati ko‘rsatish shartnomasi hamda O‘zbekiston Respublikasining amaldagi qonunchiligi talablariga muvofiq amalga oshiradi.
Agar ota-ona (qonuniy vakil) mazkur Siyosatda va O‘quvchiga pullik ta’lim xizmati ko‘rsatish shartnomasida belgilangan muddatlarda o‘qishni to‘xtatish to‘g‘risida Maktabni yozma ravishda xabardor qilmasa, o‘quvchi keyingi o‘quv davri uchun o‘qishni davom ettirish niyatida deb hisoblanadi.
Bunday hollarda keyingi o‘quv davri uchun to‘lov majburiyatlari tomonlar o‘rtasida tuzilgan O‘quvchiga pullik ta’lim xizmati ko‘rsatish shartnomasi shartlariga muvofiq belgilanadi.
TO‘LOVLARNI QAYTARISH
O‘quvchi ta’lim xizmatlaridan foydalanishni davom ettira olmagan taqdirda, ota-ona (qonuniy vakil) to‘langan mablag‘larni qaytarish masalasi yuzasidan Maktab ma’muriyatiga tegishli oyning 5-sanasiga qadar yozma murojaat qilishi shart.
Agar murojaat tegishli oyning 5-sanasidan keyin berilsa, mazkur oy uchun to‘langan ta’lim to‘lovi qaytarilmaydi va ushbu oy uchun ta’lim xizmatlari ko‘rsatilgan deb hisoblanadi.
Agar o‘quvchi Maktabning ichki tartib-qoidalari, Xulq-atvor kodeksi, Akademik halollik siyosati yoki boshqa majburiy qoidalarni buzganligi uchun intizomiy asoslarda Maktabdan chiqarilsa, tegishli davr uchun to‘langan mablag‘lar qaytarilmaydi.
Qaytariladigan mablag‘ miqdori quyidagi omillardan kelib chiqqan holda hisoblanadi:
- o‘qishni to‘xtatish to‘g‘risidagi yozma ariza Maktab tomonidan qabul qilingan sana;
- Qabul bo‘limi tomonidan berilgan o‘qishni to‘xtatish to‘g‘risidagi rasmiy tasdiq xatida ko‘rsatilgan sana;
- o‘quvchining Maktabdagi oxirgi o‘qish kuni;
- Maktab oldida to‘lanmagan qarzdorlikning mavjud yoki mavjud emasligi;
- O‘quvchiga pullik ta’lim xizmati ko‘rsatish shartnomasi shartlari.
Agar ota-ona (qonuniy vakil)ning Maktab oldida to‘lanmagan qarzdorligi mavjud bo‘lsa, ushbu qarzdorlik qaytarilishi lozim bo‘lgan mablag‘dan qonunchilik va shartnoma talablariga muvofiq ushlab qolinishi mumkin.
To‘lovlarni qaytarish faqat o‘quvchining Maktabdan chiqishi belgilangan tartibda rasmiylashtirilganidan hamda ushbu Siyosatda nazarda tutilgan barcha talablar bajarilganidan keyin amalga oshiriladi.
Maktab tomonidan tasdiqlangan qaytariladigan mablag‘lar tasdiqlangan kundan boshlab 30 (o‘ttiz) kalendar kuni ichida qaytariladi.
Qaytarish dastlabki to‘lov amalga oshirilgan hisob raqamga yoki dastlabki to‘lov usuli orqali amalga oshiriladi.
Agar bank yoki to‘lov tizimi komissiyasi mavjud bo‘lsa, ushbu komissiyalar qaytariladigan mablag‘dan ushlab qolinishi mumkin.
TIBBIY SABAB
Tibbiy sabablarga ko‘ra O‘quvchining ta’limni davom ettirishiga to‘sqinlik qiluvchi, hujjatlar bilan tasdiqlangan og‘ir tibbiy holat yuzaga kelgan taqdirda, to‘langan pul mablag‘larini qaytarish masalasi Maktab ma’muriyati tomonidan har bir holat bo‘yicha alohida tartibda ko‘rib chiqiladi. Bunday holatni tasdiqlovchi hujjatlar, shu jumladan vakolatli tibbiyot muassasasi yoki shifokor tomonidan berilgan tibbiy ma’lumotnoma, O‘quvchi o‘qishni tark etgan kundan boshlab 14 (o‘n to‘rt) kalendar kuni ichida Maktabga taqdim etilishi shart.
FORS-MAJOR
Tabiiy ofat, epidemiya, hukumat qarori, qurolli mojaro yoki Tomonlarning irodasiga bog‘liq bo‘lmagan boshqa fors-major holatlari sababli Maktab faoliyati yoki ta’lim xizmatlari vaqtincha to‘xtatilgan taqdirda, Maktab imkon qadar ta’lim jarayonini muqobil shaklda, shu jumladan onlayn ta’lim, masofaviy topshiriqlar, qo‘shimcha darslar yoki boshqa maqbul shakllarda davom ettirish choralarini ko‘radi.
Agar muqobil ta’lim shakllari 30 (o‘ttiz) ketma-ket o‘quv kuni davomida taqdim etilmasa, Ota-ona/Vasiyga foydalanilmagan davr uchun to‘langan pul mablag‘lari mutanosib ravishda qaytariladi yoki Tomonlarning kelishuviga ko‘ra keyingi to‘lovlar hisobiga o‘tkaziladi.
SHARTLAR VA QOIDALAR
- O‘quvchi Maktabga qabul qilinib, ta’lim olishni boshlaganidan so‘ng, ta’lim xizmatlari uchun to‘lovlar O‘quvchiga pullik ta’lim xizmati ko‘rsatish shartnomasi hamda mazkur Siyosat shartlariga muvofiq amalga oshiriladi.
- O‘quvchining vaqtincha sabablarga ko‘ra (kasallik, ta’til, shaxsiy sabablar va boshqa holatlar) darslarda qatnashmagan davri uchun ta’lim to‘lovlari qayta hisoblanmaydi va qaytarilmaydi, agar qonunchilikda yoki O‘quvchiga pullik ta’lim xizmati ko‘rsatish shartnomasida boshqacha tartib nazarda tutilmagan bo‘lsa.
- Agar Maktab oldida to‘lanmagan qarzdorlik mavjud bo‘lsa, Maktab ushbu qarzdorlik summasini O‘quvchiga pullik ta’lim xizmati ko‘rsatish shartnomasi hamda O‘zbekiston Respublikasining amaldagi qonunchiligiga muvofiq ushlab qolish huquqiga ega.
- Agar o‘qishni to‘xtatish to‘g‘risidagi yozma xabarnoma ushbu Siyosatda belgilangan muddatlardan kechiktirib taqdim etilsa, ta’lim uchun to‘langan mablag‘larni qaytarish mazkur Siyosatning «To‘lovlarni qaytarish tartibi» bo‘limi hamda O‘quvchiga pullik ta’lim xizmati ko‘rsatish shartnomasi shartlariga muvofiq amalga oshiriladi.
- Agar o‘qishni to‘xtatish to‘g‘risidagi xabarnoma berilgan bo‘lsa, ammo o‘quvchi xabarnomada ko‘rsatilgan sanadan keyin ham Maktabda ta’lim olishni davom ettirsa, ta’lim xizmatlari uchun haqiqatda ko‘rsatilgan xizmatlar qiymati amalda o‘qilgan davr uchun qayta hisoblanadi hamda qaytariladigan mablag‘dan ushlab qolinishi mumkin.
- To‘lovlarni qaytarish uchun ota-ona (qonuniy vakil) Maktab talabiga muvofiq to‘lov amalga oshirilganligini tasdiqlovchi hujjatlarni (bank to‘lov topshiriqnomasi, to‘lov kvitansiyasi yoki boshqa to‘lov hujjatlari) taqdim etadi.
- To‘lovlarni qaytarish mazkur Siyosat, O‘quvchiga pullik ta’lim xizmati ko‘rsatish shartnomasi hamda O‘zbekiston Respublikasining amaldagi qonunchiligiga muvofiq amalga oshiriladi.
TO‘LOVLARNI QAYTARISH TARTIBI
Ta’lim uchun to‘langan mablag‘lar, shu jumladan to‘lovni amalga oshirgan shaxsga yoki yuridik shaxsga, imkoni bo‘lgan taqdirda, to‘lov amalga oshirilgan usul bilan qaytariladi.
Agar to‘lovni amalga oshirgan usul orqali mablag‘ni qaytarish texnik yoki huquqiy jihatdan mumkin bo‘lmasa, mablag‘lar to‘lovni amalga oshirgan shaxs tomonidan yozma ravishda ko‘rsatilgan bank hisobvarag‘iga bank o‘tkazmasi orqali qaytariladi.
Yuridik shaxs tomonidan amalga oshirilgan to‘lovlar bo‘yicha mablag‘lar mazkur yuridik shaxsning rasmiy bank hisobvarag‘iga, agar shartnoma yoki qonunchilikda boshqacha tartib nazarda tutilmagan bo‘lsa, qaytariladi.
Xorijiy bank hisobvarag‘iga mablag‘larni qaytarish O‘zbekiston Respublikasining valyuta operatsiyalariga oid qonunchiligi, bank qoidalari hamda shartnoma shartlariga muvofiq amalga oshiriladi. Bunda bank komissiyalari yoki xalqaro pul o‘tkazmalari bilan bog‘liq boshqa xarajatlar to‘lovni amalga oshirgan shaxs zimmasiga yuklatilishi mumkin, agar shartnoma yoki qonunchilikda boshqacha tartib belgilanmagan bo‘lsa.
TO‘LOVNI QAYTARISH SHARTLARI
To‘lovlarni qaytarish quyidagi shartlar to‘liq bajarilganidan keyin amalga oshiriladi:
- o‘quvchining Maktabdan chiqishi belgilangan tartibda rasmiylashtirilgan bo‘lishi;
- Maktabning vaqtincha foydalanish uchun berilgan barcha mol-mulki to‘liq va but holda qaytarilgan bo‘lishi;
- Maktab oldidagi mavjud barcha moliyaviy majburiyatlar bajarilgan bo‘lishi;
- to‘lovni tasdiqlovchi hujjatlar va to‘lovni qaytarish uchun zarur bo‘lgan bank rekvizitlari taqdim etilgan bo‘lishi.
O‘quvchiga tegishli rasmiy ta’lim hujjatlari, akademik ma’lumotnomalar va boshqa hujjatlar Maktab oldidagi moliyaviy va boshqa majburiyatlar to‘liq bajarilganidan keyin O‘zbekiston Respublikasi qonunchiligi hamda O‘quvchiga pullik ta’lim xizmati ko‘rsatish shartnomasi talablariga muvofiq taqdim etiladi.
SIYOSATGA O‘ZGARTISH KIRITISH
Maktab amaldagi qonunchilik, ta’lim sohasidagi normativ-huquqiy hujjatlar yoki Maktab faoliyatidagi o‘zgarishlar munosabati bilan ushbu Siyosatga o‘zgartirish va qo‘shimchalar kiritish huquqiga ega.
Ushbu Siyosatning yangi tahriri Maktab ijrochi direktori tomonidan tasdiqlangan kundan boshlab kuchga kiradi.
Siyosatning amaldagi tahriri Maktabning rasmiy veb-saytida va (yoki) ota-onalar uchun boshqa rasmiy axborot kanallarida e’lon qilinadi.
Ota-ona (qonuniy vakil) ushbu Siyosat bilan tanishish va undagi o‘zgartirishlardan xabardor bo‘lib borish uchun mas’ul hisoblanadi.